ՀԱՎԱՔԱԾՈՒ

Հայկական բաժին

Թանգարանի դահլիճներից մեկում ցուցադրված է Հովհաննես Թումանյանի հեքիաթների հիման վրա կատարված նկարների շարքը, մյուսում՝ «Սասունցի Դավիթ » էպոսի թեմաներով նկարազարդումները: Մեկ այլ ցուցադրություն նվիրված է Եվրոպայի օրվան, որտեղ ներկայացված են պատկերներ Եվրոպական հեքիաթներից, այդ երկրեների հերոսները և ճարտարապետական կառույցները, ինչպիսին են՝ Վենետիկի Սանտա Մարիա դելլա Սալյուտե տաճարը, Բարսելոնայի Սագրադա Ֆամիլիա տաճարը, Լոնդոնի Բիգ Բենը, Փարիզի Աստվածամոր տաճարը, Կոպենհագենի Տիվոլի զբոսայգին և այլն: Հաջորդ սենյակում կարելի է տեսնել Քրիստոսի ծննդյանը նվիրված նկարազարդումներ և բատիկ ստեղծագործություններ, ինչպես նաև Նոյան տապանը պատկերող խեցեգործական աշխատանքներ: Առաջին հարկի վերջին դահլիճում գտնվում են կիրառական և դեկորատիվ արվեստի նմուշներ՝ ասեղնագործություն, բատիկ, կարպետ, մետաղական աշխատանքներ, փայտի և քարի փորագրություն և խեցեգործություն:

Դեկորատիվ կիրառական արվեստի բաժին

Թանգարանի դեկորատիվ-կիրառական արվեստի բաժնի հավաքածուն թվաքանակով ամենահարուստն է: Թանգարանի այս բաժնում ներկայացված են «Նոյան Տապան», «Սասունցի Դավիթ», «Բաբելոնի աշտարակ», «Սարդարապատի հաղթանակի օր» խեցեգործական նախագծերը: Այս հատվածի ցուցադրումը ներառում է նաև բատիկներ կատարված աստվածաշնչի և էպոսների հիման վրա, փայտե, մետաղական և քարե նմուշներ, գոբելեններ, ասեղնագործություն, կարպետներ:

Արտասահմանյան բաժին

Միջազգային բաժնի հավաքածուն հարստացված է աշխարհի ավելի քան 120 երկրների (Ավստրալիա, Ավստրիա, Բելգիա, Բրազիլիա, Կանադա, Չինաստան, Կիպրոս, Դանիա, Ֆինլանդիա, Ֆրնասիա, Գերմանիա, Մեծ Բրիտանիա, Հունաստան, Հնդկաստա, Իրան, Իտալիա, Ճապոնիա, Մալթա, Նիդերլանդներ, Նորվեգիա, Լեհաստան, Պորտուգալիա, Իսպանիա, Շվեդիա, Շվեյցարիա և այլն) երեխաների ստեղծագործություններով: Այս աշխատանքները թանգարանը ստացել է ՀՀ կրթության և գիտության նախարարության, Մշակույթի նախարարության և Արտասահմանյան երկրների հետ մշակութային կապերի կոմիտեի կողմից: 1980 թ. Օլիմպիական խաղերի ժամանակ Մոսկվայում ներկայացվեց մանկական ստեղծագործությունների միջազգային ցուցահանդես, որը կազմակերպել էր Հենրիկ Իգիթյանը: Ցուցադրության ավարտից հետո լավագույն աշխատանքները փոխանցվեցին Երևանի Մանկական ստեղծագործության թանգարանին, քանի որ դա միակ վայրն էր, որտեղ այս աշխատանքները կարող էին ցուցադրվել: Անգլիացի երեխաների նկարները թանգարանին նվիրաբերել է Մեծ Բրիտանիայի նախկին վարչապետ Հարոլդ Ուիլսոնը՝ 1976 թ. Խորհրդային Միություն կատարված այցի ընթացքում: Իսպանիայի մանուկների նկարները նվիրաբերվել են Խորհրդային Միությունում Իսպանիայի դեսպանի կողմից: Հավաքածուն պարբերաբար  թարմացվում է արտասահմանյան երկրների պատվիրակությունների օժանդակությամբ: