ՆՈՐՈՒԹՅՈՒՆՆԵՐ

 

Համահայկական մանկապատանեկան նկարչական ամենամյա մրցույթ-փառատոն

Մեկնարկում է Համահայկական մանկապատանեկան նկարչական ամենամյա մրցույթ-փառատոնին մասնակցության առցանց հայտերի ընդունումը։
Ընթացակարգի և դիմելու մանրամասները ներկայացված են  հղման մեջ։
Հիշեցնենք, որ Համահայկական մանկապատանեկան նկարչական ամենամյա մրցույթ-փառատոնին կարող են մասնակցել 6-18 տարեկան արվեստասեր և ստեղծագործական շնորհք ունեցող հայ մանուկներ և պատանիներ ամբողջ աշխարհից։
Հայտերն ընդունվում են մինչև Հուլիսի 15-ը:

«Ապրողները» Խաչվող հայացքներ

Գեղագիտության ազգային կենտրոնի թանգարանում (հասցե` Աբովյան 13) մարտի 23-ից գործում է «Ապրողները» խորագրով ցուցահանդեսը, որի շրջանակում ներկայացված են հինգ երիտասարդ ֆրանսիացի և հայ լուսանկարիչների աշխատանքները:

Նախագիծն իրականացվում է Հայաստանում Ֆրանսիայի դեսպանության հետ համագործակցության շրջանակում։

Մուտքն ազատ է:

ԳԱԿ Փոքր թատրոնը՝ բրիտանական պարբերականի դիտակետում

Ովքե՞ր են Երևանի երիտասարդ ստեղծագործողները։ Ի՞նչն է նրանց մղում նոր ձևերի ու բովանդակության փորձարկման՝ չվախենալով տարատեսակ սահմաններից ու պատնեշներից։ Բրիտանական հեղինակավոր The Calvert Journal պարբերականը զրուցել է վեց հայ երիտասարդ արվեստագետների հետ՝ բացահայտելով նրանց անցած ճանապարհը, ստեղծագործելու ազդակներն ու հիմնական թեմաները։ The Calvert-ն իր ընթերցողներին է ներկայացրել նաև ԳԱԿ տնօրեն, Փոքր թատրոնի գեղարվեստական ղեկավար Վահան Բադալյանին։

Հոդվածը կարող եք կարդալ այստեղ։

ԿԵՆՏՐՈՆԻ ՄԱՍԻՆ

1968թ. Հայաստանի Նկարիչների Միությունում բացվեց անսովոր ցուցահանդես: Մի նոր աշխարհ՝ մաքուր, հորինված, կանոններից և պայմանականություններից ազատ, արձանագրեց իր սեփական տեղը գեղագիտական արժեքների հիերարխիայի մեջ ունենալու իրավունքը: «Աշխարհը երեխաների աչքերով» ցուցահանդեսի նախաձեռնողները և կազմակերպիչներն էին արվեստաբան Հենրիկ Իգիթյանը և մանկավարժ Ժաննա Աղամիրյանը: Ցուցահանդեսում ներկայացված էին 800-ից ավելի մանկական աշխատանքներ Երևանի 65 դպրոցներից և գեղարվեստական ստուդիաներից: Ցուցահանդեսի կազմակերպիչները հասան իրենց նպատակին. մանկական ստեղծագործությունը ապացուցեց իր «արվեստ» կոչվելու իրավունքը:

Սակայն դա դեռ գործի մեկ մասն էր. հարկավոր էին պայմաններ այդ հարուստ, գունագեղ և ֆանտաստիկ աշխարհը պահպանելու` լայն հասարակության համար ավելի մատչելի դարձնելու նպատակով:

Այսպիսով, 1970թ. մարտի 13-ին, Երևան քաղաքում, Աբովյան փողոցի N 13 շենքում բացվեց Մանկական պատկերասրահը: Այդ փաստը իրադարձություն դարձավ ոչ միայն քաղաքի, այլ նաև ամբողջ երկրի (նախկին ԽՍՀՄ) կյանքում, քանի որ աշխարհում այսպիսի համանմանություն չկար: Երկու շաբաթվա ընթացքում ցուցահանդեսը այցելեցին ավելի քան 120 000 մարդ:

Մանկական պատկերասրահը շատ արագ մեծ համբավ ձեռք բերեց Հայաստանից դուրս, և այսօր այնտեղ պահպանվում են աշխարհի 110 երկրներից ավելի քան 150 000 մանկական աշխատանքներ: Հետագայում Մանկական պատկերասրահը հիմք ծառայեց Գեղագիտության ազգային կենտրոնի (ԳԱԿ) ստեղծման համար, և 1980թ. Կենտրոնը դարձավ իրականություն` վերածվելով երեխաների արվեստի ու գեղագիտական կրթության մշտական հանգրվանի:

Այսօր Կենտրոնում գործում է “Կերպարվեստ և դեկորատիվ կիրառական արվեստ” ստորաբաժանումը իր բազմաթիվ արվեստանոցներով, երկու թատրոններ՝ «Փոքր Թատրոնը» և «Մետրո» թատրոն-ստուդիան, ինչպես նաև մանկական ֆիլհարմոնիան և ազգային նվագարանների յոթնամյա երաժշտական դպրոցը: Գոյություն ունեն նաև մասնաճյուղեր Երևանից դուրս՝ Գյումրիում, Վանաձորում, Մեղրիում, Սևանում և Գորիսում:

Աջակցեք ԳԱԿ-ի ցուցահանդեսներին և նախագծերին